අද ජීවමානව වැඩසිටින අතිපූජනීයවු ඒ මහා බුද්ධ පුත්‍රයාණෝ...

අතිපූජනීය මහනුවර වජිරබුද්ධි මහ රහතන්වහන්සේ නිර්මල ආර්ය අෂ්ඨාංගික මාර්ගය ප්‍රගුණ කිරිම සදහා වනවාසී විශිෂ්ට ගුරුවරු ඇසුරු කරමින් ගෞතම බුදුන් වහන්සේගේ නිර්මල දහම ගවේශනය ආරම්භ කර ඇත්තේ 1990 වර්ශයේය. කුඩාකල සිටම නිර්මාණශීලි ගවේශනාත්මක චරිත ලක්ෂණ වලින් හෙබි උන්වහන්සේ තුළ, සිද්ධාර්ථ චරිතය පිළිබඳව ඇතිවූ කුතුහලය, ගෞතම බුදුන්වහන්සේගේ ධර්මය ගවේශනය කිරීමේ ආරම්භය විය. තරුණවියේදීම රාජකීය සැපසම්පත් ඇතහැර, බුදුන් වහන්සේ සොයාගත් සැනසුම කුමක්ද? නිර්වානය යනු කුමක්ද? එය වර්තමානයේ කෙනෙකුට ලබාගත හැකිද? යන කාරණා ඔස්සේ සිය ගවේශනය ආරම්භ කළ වජිරබුද්ධි තෙරුණුවෝ, ප්‍රථමයෙන් බාහිර සමජයේ පවතින ප්‍රසිද්ධ බුදු දහම සහ පොත්පත් පරිශීලනය කලේය. නමුත්, සමාජගත පන්සල් සම්ප්‍රදාය තුළ බුදුන් වහන්සේ පැවසූ නිර්මල දහම නොමැති බවත්, බුද්ධ දේශනාව තුල නිරන්තරයෙන් සදහන් ආරණ්‍යගතෝවා, රුක්ඛමූලගතෝවා, ශුණ්‍යාඝාරගතෝවා යන කරුණ අනුව කැලයක, වෘක්ෂමූලයක හෝ හිස්තැනක මේ ආර්‍ය මාර්ගය වඩන අය හමුවිය හැකි බවත්, උන්වහන්සේ සිය ගවේශනය තුළින් අවබෝධ කරගත්තේය. ඒ අනුව සිය ගවේශනය වඩාත් ප්‍රායෝගික මාර්ගයක් ඔස්සේ රැගෙන ගිය උන්වහන්සේ ආරණ්‍යගතව විවිද ප්‍රවීණ ගුරුවරු ඇසුරේ ආර්‍ය අෂ්ඨාංගික මාර්ගය ප්‍රගුණ කළේය. දශකයකට වැඩි කාලයක් තුළ ලැබූ ප්‍රායෝගික ගවේශනයේ ප්‍රතිඵලයක් ලෙස 2001 වර්ශයේ ආර්‍ය තත්ත්වයට පත්වීමට උන්වහන්සේට හැකි විය. වයස අවුරුදු 44 වනවිට අරහත්ඵලයට පත්වූ උන්වහන්සේ, බුද්ධ භාෂිතය තමන් විසින්ම තම උත්සාහයෙන් සාක්ශාත් කරගත්තේ, එම මාර්ගය තුළ හමුවූ ආර්‍යයන්වහන්සේලාගේ නිවැරදි මඟපෙන්වීම යටතේය. උන්වහන්සේගේ අවසාන ආචාර්යවරයා වන්නේ අතිපූජනීය අග්ගමහා කම්මට්ඨානාචාර්‍ය කිරිමැටියානේ අරියඥාන මහා රහතන් වහන්සේයි. (අරහත් වජිරබුද්ධි තෙරුණුවන් පැවිදි වූයේද උන්වහන්සේ යටතේය.) උන්වහන්සේ ලංකාවේ ප්‍රමුඛ පෙලේ ආරණ්‍යක භාවනා කර්මස්තාන ආචාර්යවරයා ලෙස වැඩවසමින් සිට 2005 වසරේ පිරිනිවන්පා වදාලේය.

අතිපූජනීය වජිරබුද්ධි මහ රහතන්වහන්සේ තම මාර්ගය සම්පූර්ණ කළ මෙම කාලය වන විට, සමාජය තුළ ලෞකික ලාභ සත්කාර අපේක්ෂාවෙන් ඇතැම් භික්ෂූන් හා ගිහියන් විසින් නිර්මල බුදු දහම විකුර්ති කරමින් තම තමාට රිසි සේ මේ උතුම් ඉගැන්වීම දැනුවත්ව හෝ නොදැනුවත්ව අවභාවිතා කරමින් පසුවූ යුගයක් විය. අවාසනාවන්ත ලෙස චතුරාර්‍ය සත්‍ය හෙවත් බුදුන් වහන්සේගේ මූලික ඉගැන්වීම පිලිබදව භික්ෂූන් අතර හෝ ගිහි සමාජය අතර නිවැරැදි අවබෝධයක් නොතිබුණු අතර ඔවුන් විසින් එය දිගින් දිගටම විකුර්ති කරමින් පසුවිය. බුදු දහමේ ප්‍රායෝගික හරය වැදුම් පිදුම් වත් පිළිවෙත් වලින් පමණක් වැසී යමින් පැවතුනි. රහත් බව, නිර්වානය යනු මේ ආත්මයේ ලබාගත නොහැක්කක් යැයි සිතමින් මෛත්‍රී බුද්ධ ශාසනයක් තුළ නිවන් ප්‍රර්ථනා කරමින් සිටි යුගයක මෙම තරුණ බුද්ධ පුත්‍රයාණන්වහන්සේ විසින්, රහත් බව යනු ප්‍රයෝගිකව ලබාගත හැකි දෙයක් බවත්, අදටත් රහතන් වහන්සේලා වැඩසිටින බවත් පවසමින් 2006 වසරේදි ශ්‍රි ලංකා ගුවන් විදුලි සංස්ථවේ කඳුරට සේවය ඔස්සේ පවත්වන ලද දේශනා මාළාව මෙරට බෞද්ධ සමාජය උඩු යටිකුරු කරන්නක් විය.

උන්වහන්සේ විසින්, "සදහම් මග", "ලෝකය", "ශ්‍රද්ධාව" සහ "බුද්ධ ශාසනය" යන මාතෘකා සතර ඔස්සේ බුදු දහම තුළ සමස්ථ හරයම කැටිකරමින් පැවැත්වූ දේශනා මාලාව එවකට සමාජය තුළ පැවති බුදු දහම පිළිබද බොහෝමයක් මිත්‍යා මත ඛණ්ඩනය කිරීමට සමත් විය. බුදු දහම ගවේශනය කළ බොහෝමයක් දෙස් විදෙස් බෞද්ධයන් තුළ නව ජීවයක් ඇති කළ මෙම දේශනා මාලව සාම්ප්‍රදායික බුදු දහම, අර්ථික ජීවන මාර්ගයක් කරගත් ඇතැම් චීවරදාරින්ට මරු පහරක් විය.

වැදුම්පිදුම්, වත්පිළිවෙත්, පුද පූජා පසු පස හඹායමින් සියලු දේ ප්‍රාර්ථනා කරමින් මුලා වී සිටි බෞද්ධ සමාජයට, ශ්‍රද්ධාව යනු භක්තිය නොවෙන බවත්, මාර්ගය වැඩීමෙදී වර්ධනය වන ධර්මයක් බවත්, ප්‍රාර්ථනා කරමින් නිවන අත්කරගත නොහැකි බවත්, එ සදහා වැඩිය යුතු මාර්ගය ආර්ය අෂ්ඨාංගික මාර්ගය බවත්, පෙන්වාදුන් උන්වහන්සේගේ දේශනා මාලාව, 2008 වසරේ "ගෞතම බුදුන් වහන්සේ වදාල නිවන් මග" යනුවෙන් පොතක් බවට පරිවර්තනය විය. එමෙන්ම, එම පොත උදෙසා තිබු දෙස් විදෙස් ආකර්ෂණය හෙතුකොට ගෙන එයින් වසර දෙකකට පසු එහි ඉංග්‍රිසි සහ වෙනත් භාෂා පරිවර්තනයන්ද බිහි විය. උන්වහන්සේගේ ධර්මය සමාජය තුළ කොතරම් පිබිදීමක් ඇතිකලේදයත්, එය සාම්ප්‍රදායික පන්සල් බුදු දහමට මරු පහරක් වීම හේතුවෙන්, උන්වහන්සේ විසින් පවත්වගෙන යනු ලැබූ කොත්මලේ කඩදොර ආරණ්‍ය සේනාසනය ප්‍රචණ්ඩකාරී පිරිසක් විසින්, දේශපලකයන්ගේ අනුදැනුමද ඇතුව පැය කිහිපයකින් විනාශ කරනු ලැබීය. බුදු දහම ප්‍රායෝගිකව ප්‍රගුණ කිරීම සදහා අවශ්‍ය සියලු අංගයන්ගෙන් සම්පුර්ණව වසර ගණනාවක් තිස්සේ පවත්වාගෙන යනු ලැබූ මෙම ආරණ්‍ය සේනාසනය බිඳ දැමීම නිර්මල දහම ගවේශනය කරන්නාවූ තරුණ පිරිසට සිදුකරනු ලබු අති මහත් විනාශයකි.

සියලු සත්වයන් කෙරෙහි අනුකම්පාවෙන් තමා ප්‍රායෝගිකව ප්‍රගුණ කළ මාර්ගය ලොවට දේශනා කිරීම හේතුවෙන් වජිරබුද්ධි තෙරුණුවන් ලද පීඩාවන් එතෙකින් අවසන් නොවුනි. ආරම්භයේ සිටම පිණ්ඩපාතිකව එක් වේලක් පමණක් ආහර වලඳමින් යැපුණු මේ උතුම් බුද්ධ පුත්‍රයාණන්වහන්සේගේ පිණ්ඩපාතය වැළැක්වීමට තරම් වර්ථමාන සමාජය දූෂිත විය. එමෙන්ම, උන්වහන්සේ සොයා දානය රැගෙන පැමිණෙන දායකයින්හට තර්ජනය කර උන්වහන්සේව හුදකළා කිරිමට ප්‍රචණ්ඩකාරි පිරිස් නිරන්තරයෙන් උත්සාහ කළේය. උන්වහන්සේගේ දේශනා කෙරෙහි ගවේශනාත්මක තරුණ පිරිසගේ ආකර්ෂනය වැඩිවීමත්, එම දේශනා හේතුවෙන් සාම්ප්‍රධායික බුදු දහම ප්‍රසිද්ධියේ විවේචනයට ලක්වීමත් මොවුන්ගේ වෛරය වර්ධනය කිරිමට හේතුවක් විය. ඉතා විහිළු සහගත මෙන්ම අභූත හේතු මවමින් උන්වහන්සේට විරුද්ධව නඩු ගණනාවක් පැවරිම මෙහි තවත් ප්‍රතිඵලයක් විය. වනයක එකලාව වසන කෙසර සින්හයෙකු වන් බුද්ධ පුත්‍රයෙකු බොල් සුලඟකින් බිය ගැන්විය නොහැකිසේ ඔවුන්ගේ සියළු උත්සහයන් නිශ්ඵල වු තැන්හි, උන්වනසේ දැනට වැඩ වාසය කරන ශුණ්‍යාඝාරයට පෙට්‍රොල් බොම්බ ප්‍රහාර එල්ල කර උන්වහන්සේගේ ජීවිතයට හානි කිරීමට උත්සාහ කිරිමට තරම් මෙම සමාජය පාපකාරී විය. එහෙත්, ධර්මයෙහි හැසිරෙන්නා ධර්මය විසින් රකී යන බුද්ධ දේශනාව සනාතන සත්‍යයක් බව පසක් කරමින් උන්වනසේගේ රෝමකූපයකටවත් හානි කිරීමට මේ කිසිඳු උත්සාහයකට නොහැකි විය. එදා මෙදා තුර එල්ලවු සියලු අභියෝගයන් පයට පෑගෙන දූවිල්ලක් තරම්වත් නොසළකා අදටත් ශ්‍රි ලංකවේ මධ්‍ය කඳුකරයේ හුදකළාව වාසය කරන උන්වහ්න්සේ තමාගෙන් ලෝකයට විය යුතු මෙහෙය අඛණ්ඩව ඉටු කරමින් සිටියි.

කිසිදු නිකායකට සම්බන්ධ නොවී, මාර්ගඵල ලාභී ගුරුවරු ඇසුරෙන් මාර්ගය ප්‍රගුණ කරන නිර්මල, ථේරවාද සම්ප්‍රදාය තුළ සිටින උන්වහන්සේ, "සංඝ" යනුවෙන් බුදුන් වහන්සේ හදුන්වනු ලැබූ, සෝවන්, සකෘදාඝාමී, අනාඝාමි, මහරහත් පිරිසේ වර්තමනයේ වෙසෙන මුදුන් මල්කඩකි. චේතෝවිමුක්ත හෙවත් උභතෝබාගවිමුක්ත රහතන්වහන්සේ නමක් ලෙස සිය දේශනා තුළින් දහම් පෙළහැරපෑ උන්වහන්සේ, එම දේශනා ප්‍රාතිහාර්ය තුළින්ම තම අරහත්වය ලෝකයාහට ප්‍රකාෂයට පත්කළ මහා උත්තම‍යාණන්වහන්සේ නමකි.

1957 වසරේ මහනුවරදි උපත ලබා දීප්තිමත් ශිෂ්‍යයකු ලෙස මහනුවර ප්‍රමුඛ පාසලකින් පාසල් ජීවිතය අවසන් කළ උන්වහන්සේ කොළඹ ප්‍රදේශයේ පළමු පෙලේ විශ්ව විද්‍යාලයක සිය විද්‍යාවේදී විශේෂ උපාධිය අවසන් කළේය. සිය දක්ෂතාවය නිසාම තරුණ අවදියේම ප්‍රසිද්ධ ආයතන කිහිපයක කළමණාකාර දූර හොබවා, දරු දැරියන් තිදෙනෙකුගේ සදාදරණීය පියෙකු ලෙස යහපත් සුඛෝපබොගී පවුල් ජීවිතයක් ගතකරමින් සිටියදී, බුදු දහමේ ප්‍රායෝගික සත්‍ය සොයා ගිය උත්තම‍යාණන්වහන්සේ නමකි. සිදුහත් කුමරුන් රජ සැප අත්හැරියා සේම, සිය සුඛෝපබොගී ලෞකික ජීවිතය අත්හැර වනවාසී වූ උන්වහන්සේ නිර්වානය සොයන වර්ථමාන තරුණ පිරිසට ජීවමාන පුර්වාදර්ශකි. ඉතා ලාමක සැප අත්හැර නොහැකිව නිවසේ සිට නිවන් සොයන්නට වෙර දරන කාමභෝගි ගිහි පිරිසට මේ මහා යතිවරයාණන්වහන්සේගේ චරිතය තුළින් උගත හැකි දේ අති මහත්ය. සතර සතිපට්ඨානය, ආර්ය අෂ්ඨාංගික මාර්ගය ප්‍රායෝගිකව වඩන අයුරු මනාසේ විස්තර කරමින් උන් වහන්සේ පැවත්වු දේශනා, නිවැරදි අධිෂ්ඨානයෙන් මාර්ගය සොයන, තවත් සියවස් ගණනාවක තරුණ පරපුරට අලෝකයක්ම වනු නොඅනුමානය.

ලෝකවාසි සියළු සතුන්ගේ හිතසුව පිණිස ජීවමානව වැඩසිටින උභතෝභාගවිමුක්ත අතිපූජනීය වජිරබුද්ධි මහ රහතන්වහන්සේට අපගේ නමස්කාර වේවා!..

සියැසින් දුටු මහ රහතන්වහන්සේ

බුදුන්වහන්සේ වරෙක නිර්වාණය සාක්ශාත් කරන උතුමන්වහන්සේලා, විලක පිපුණු රත් පියුමන් වලට උපමා කල සේක. මඩෙන් ඉපිද, මඩෙන් මතුව, ජලයෙහි නොගැටී, පිපී දිලෙනා රත් පියුම් බඳුවූ, ඒ උත්තරීතර රහතන් වහන්සේලා කෙබඳුද යන්නට අප දුටු ජීවමාන උදාහරණය ඒ උතුම් මහ යතිවරයාණන් වහන්සේමය. ජනශූන්‍ය කඳු මුදුනක, හුදෙකලා කුටියක වසමින්, මඩෙන් වෙන්ව, ජලයේ නොගැටී සිටිනා පියුමක්සේ කෙලෙසුන්ගෙන් පිරි සමාජයෙන් ඉවත්ව සිටින උන්වහන්සේ, එලෙස හිඳිමින්ම ධර්මයේ ආඥාචක්‍රය මුළු ලෝකධාතුව කෙරෙහිම විහිදුවාලන ආකාරය විශ්මයජනකය.

ප්‍රසිද්ධිය, පිරිස් බලය සඳහා ඕනෑම ක්‍රියාවක් සිදුකරන චීවරධාරීන්ගෙන් පිරිණු ලෝකයක, තම ශ්‍රාවකයන්ට, තමන් වැඩසිටින ස්ථානය සම්බන්ධව කිසිදු ඉඟියක් හෝ ලබානොදෙන උන්වහන්සේ, මහා ජනගඟක් සමගින් හෝ කළ නොහැකි වූ සමාජ විප්ලවයක් තම දේශනා ප්‍රාතිහාර්‍ය තුළින් පමණක්ම සිදු කරයි...

සාම්ප්‍රධායික, සංස්කෘතික බුද්ධාගමේ පවුරු පදනම් බිඳදැමූ උන්වහන්සේගේ ඒ දේශනා අද සමාජය තුළ බෞද්ධ දර්ශනය පිළිබඳව චින්තන විප්ලවයක් ඇති කරමින් පවතී...

රහතන්න්වහන්සේ කෙනෙක් යනු කෙබඳු කෙනෙක්දැයි සිතා ගත නොහැකී වූ මිනිසුන්ට උන්වහන්සේම ජිවමාන උදාහරණයයි...

කිසිදු දේශපාලකයෙකුට ගැතිකම් නොකරන උන්වහන්සේ, සියලු දේශපාලකයින්ගේ වැරදි නිර්භයව විවේචනය කරයි..

කිසිදු සාම්ප්‍රධායික නිකායකට නොබැඳුණු උන්වහන්සේ, සියලු නිකායන් අභිබවමින් බුද්ධ නිකාය සමාජගත කරයි..

චෛත්‍ය, පිළිම, දාගැබ්, බෝගස් වලින් පිරුනු ප්‍රතිරූපක බුද්ධාගම පසෙකලූ උන්වහන්සේ, අරිඅටමගට පිවිසෙන්නට තරුණ පිරිසට දිරි දෙමින් ප්‍රතිපත්ති පුරණ බොදුනුවන් පිරිසක් තනයි...

උන්වහසේවම අනුකරණය කරමින් බිහිවූ රහත් යැයි කියාගත් ව්‍යාජ පැවිද්දන්ගේ වෙස්මුහුණු ගැලවීයන යන කල, උන්වහන්සේගේ ගුණ සුවඳ සඳුන් සිසිලක්සේ මුළුමහත් සමාජය පුරා අස්සක් මුල්ලක් නෑරම පැතිරෙමින් පවතී..

මෙසේ මහා ප්‍රාතිහාර්‍යයන් පාන්නේ අතලොස්සක් පමණ දායක පිරිස ලබාදෙන එක් වේලක්වූ දානයක් වළඳමින්, හුදෙකලා කුටියක විවේකීව, සමාධි සුවයේ පසුවන උන්වහන්සේය...

මෙසේවූ සමාජ විප්ලවයක් ඇති කරන්නේ, දේශපාලකයින්ගේ රැස්වීම් නොඅමතන, මාධ්‍ය සංදර්ශනකරුවන්, අළුයමලූ කෙල පිඩක්සේ බැහැරකරන උන්වහන්සේය...

මෙසේ වූ අරිඅටමග වඩන බොදුනුවන් පිරිසක් ලොව පුරා බිහිකරන්නේ, දේශනා සදහා නන් දෙසින් ගලා එන දෙස් විදෙස් ඇරයුම්, ප්‍රතික්ෂේප කරමින් සිය කුටියේ, සිය අසුනේ සිට දහම් දෙසනා උන්වහන්සේය.

මල්පාවඩ මතින් නොවඩින ඒ උතුම් රහතන් වහන්සේ, උන්වහන්සේම බඳු රත් පියුම්, මේ මිහිතලය මත පුබුදුවනු සදහා සදහම් හිරු කිරණ දසත විහිදුවාලයි.

රාජ්‍ය බලය, පිරිස් බලය, ධන බලය සහ මාධ්‍ය බලය යන මේ සියල්ලට වඩා බුදුන්වහන්සේ දේශනා කල ඒ නිර්මල සද්ධර්මය බලවත් බව ලොවට පෙන්වාදෙන උන්වහන්සේ, සිය හුදෙකලා කුටියේ වැඩවසමින් ලෝකානුකම්පාවෙන් කරන්නා වූ මෙහෙවර උත්තරිතරය.

ඉතින්, මහ රහතන්වහන්සේ නමකගේ ප්‍රාතිහාර්‍ය යනු මෙයම නොවේද?....

සැරියුත් මුගලන් මහ රහත් පරපුරේ ජීවමාන පිළිබිඹුව වූ ඒ උතුම් වජිරබුද්ධි මහ රහතන්වහන්සේට මාගේ නමස්කාරය වේවා!

2021 වසරේ අප්‍රේල් මස 10 වන දින මෙම ලිපිය අන්තර්ජාලයේ පලකරනලදි.

පෙර පිටුව

ඉන්ස්ටග්‍රෑම්

info.thepathtonibbana

පෙර පිටුව

ෆේස්බුක්

ෆේස්බුක් පිටු

THE PATH TO NIBBĀNA
(සිංහල භාෂාවෙන්)

---

The Buddha's Teaching on Nibbāna
(ඉංග්‍රීසි භාෂාවෙන්)

ෆේස්බුක් කණ්ඩායම්

නිවන් මගට පිළිපන් ශ්‍රේෂ්ඨ යතිවරු
Great Buddhist Masters
(සිංහල සහ ඉංග්‍රීසි භාෂාවෙන්)

---

The Seekers' Forum of The Buddha's Teaching on Nibbāna
(ඉංග්‍රීසි භාෂාවෙන්)

පෙර පිටුව

ජංගම යෙදුම

Nibbāna
ජංගම දුරකථන / ටැබ් / iPad සඳහා මෘදුකාංග යෙදුම (App එක)

Android

මෙම මෘදුකාංග යෙදුම (App) ඔබගේ ඇන්ඩ්‍රොයිඩ් (Android) ජංගම උපාංගයට ස්ථාපිත කරගැනීමට පහත ලාංඡනය මත Click කොට ස්ථාපිත (Install) කරගන්න.

Apple iOS

මෙම මෘදුකාංග යෙදුම (App) ඔබගේ ඇපල් (Apple iOS) ජංගම උපාංගයට ස්ථාපිත කරගැනීමට පහත ලාංඡනය මත Click කොට ස්ථාපිත (Install) කරගන්න.

පෙර පිටුව

යූටියුබ්

අතිපූජනීය මහනුවර වජිරබුද්ධි මහ රහතන්වහන්සේ
(සිංහල දේශනා පමණයි)

---

Maha Arahant Mahanuwara Wajirabuddhi Thero
(ඉංග්‍රීසි දේශනා පමණයි)

---

Good Governance | Arahant Wajirabuddhi
(සිංහල)